Wia dis foto come from, Screengrab/SolaOsunmakinde/Hodchurch
Heavy fire don burn down popular Lagos church wey dey known as Household of David wen workers dey setup for programme.
Di fire accident bin happun on Wednesday morning just few hours bifor di church suppose begin dia annual ‘Mercy Conference 2024’ programme wey dey bring togeda large number of youths and adults.
Some workers bin dey do setup on Wednesday morning wen dem discover say fire dey comot for di roof of di building.
Household of David church dey located for Adeniyi Jones, Ikeja Lagos wia di conference suppose start by 5pm same Wednesday evening.
One eyewitness wey dey bifor di fire begin tok say evri wia for di church don dey set bifor di fire begin from di roof come burn di entire building.
Di witness add say na for dia front di whole musical instruments, air conditioners and projectors bin burn finish sake of say dem no fit enta di fire.
BBC News Pidgin monitor di fire accident and discover say di fire comot di entire roof, blow di window glasses and burn di floor to ashes.
“Wen I reach here, I see say many tins don burn. I gatz dey help pipo wit medical nosemask make di smoke no too affect dem as di fire burn becos some pipo dey allergic to smoke,”anoda witness tok.
Di church get overflow wia pipo wey no get chance enta di main building fit stay sake of say e dey filled-up but di fire no reach di place even though e dey inside same compound.
All di musical instruments, air conditioners, projectors, stage lights and di entire chairs for di church burn finish.
How Household of David church burn on day special programme suppose begin
Household of David church for Ikeja, Lagos Nigeria bin burn on di last day of January 2024.
Di church catch fire di day dem suppose begin one special programme – Mercy Conference 2024.
Lead Pastor of di church Sola Osunmakinde say e bin dey di church on Wednesday morning wen di fire happun and dem watch painfully as evritin burn.
“I come in di morning and evritin dey ok till we come dey hear say somtin, fire dey up di roof, e come become bigger, we call fire service but dem no come on time.
Painfully, we watch evritin burn completely. Evey seat, AC burn.” Pastor Sola tok.
Dis article contain content wey Instagram provide. We ask for una permission before anytin dey loaded, as dem fit dey use cookies and oda technologies. You fit wan read di Instagram cookie policy and privacy policy before accepting. To view dis content choose ‘accept and continue’.
Warning: Di BBC no dey responsible for di content of external sites.
End of Instagram post
Wia dis foto come from, Instagram/@hodchurch
Pastor Sola add say no life dey lost and say di conference go still begin dat day.
“We tank God say no life dey lost and we tank God for evritin. We no dey discouraged and we believe say we go still go on wit di conference.
We no dey sad, we dey happy. All tins work togeda.”
Meanwhile, di programme suppose see ministers like Moses Bliss, Dunsin Oyekan and oda pastors like Apostle Joshua Selman, Pastor Yemi David, Pastor Godman Alabi, Pastor Nathaniel Bassey and odas.
Some of dem don send dia support to di pastor.
Di church workers no allow di situation weigh dem down as dem begin dey worship God sake of say no life dey lost and dia programme go still hold as planned.
Pastor Daniel Olawande wey be anoda popular youth pastor for di Redeemed Chritstian Church of God (RCCG) and oda men of God visit di church to condole wit Household of David.
Dem later change di venue of di programme go anoda place wey go contain di crowd wey dem dey expect.
